וידבר יהו"ה אל משה אחרי מות שני בני אהרן וגו' ויאמר יהו"ה אל משה (ויקרא טז א) .
רבי יהודה אמר, כיון דכתיב וידבר יהו"ה אל משה - אמאי זמנא אחרא ויאמר יהו"ה אל משה דבר אל אהרן אחיך? דהא במלולא קדמאה סגי? אלא הכי תנינן, כתיב ויקרא אל משה וידבר יהו"ה אליו (ויקרא א א) , וכתיב ואל משה אמר עלה אל יהו"ה (שמות כד א) - והא אוקמוה מלה דהכא דרגא חד ולבתר דרגא אחרא. אוף הכא - וידבר יהו"ה אל משה - דרגא חד, ולבתר ויאמר יהו"ה אל משה דבר אל אהרן אחיך - דרגא אחרא. וכלא בחד מתקלא סלקא, ומן שרשא חדא כולא אתחבר:
אחרי מות שני בני אהרן.
רבי יצחק פתח: עבדו את יהו"ה ביראה וגילו ברעדה (תהלים ב יא) , וכתיב עבדו את יהו"ה בשמחה באו לפניו ברננה (תהלים ק ב) . הני קראי קשיין אהדדי. אלא הכי תאנא, עבדו את יהו"ה ביראה - דכל פולחנא דבעי בר נש למפלח קמי מאריה - בקדמיתא בעי יראה לדחלא מניה. ובגין דחלא דמאריה ישתכח לבתר דיעביד בחדוותא פקודי אורייתא. ועל דא כתיב מה יהו"ה אלהי"ך שואל מעמך כי אם ליראה (דברים י יב) .
וגילו ברעדה - דאסיר ליה לבר נש למחדי יתיר בעלמא דין. האי במלי דעלמא. אבל במלי דאורייתא ובפקודי דאורייתא - בעי למחדי. לבתר ישתכח בר נש דיעבד בחדוותא פקודי אורייתא דכתיב עבדו את יהו"ה בשמחה (תהלים ק ב) .
רעיא מהימנא
(הדף מכיל רק זוהר ללא רעיא מהימנא)